ပိတ်ရက်မှာ အချိန်အကြာကြီးအိပ်စက်ခြင်းက သင့်ကို အသက်ပိုရှည်စေနိုင်

ပိတ်ရက်ကျရင် အကြာကြီးအိပ်ရဖို့ တစ်ခါတရံမှာ အကြောင်းပြချက်ပေးရလေ့ ရှိပါတယ်။ ဒါပေမဲ့ အခုလေ့လာ တွေ့ရှိချက်အသစ်ကတော့ သင်အိပ်စက်နိုင်ဖို့ အကြောင်းပြချက်ကောင်းကောင်း ရရှိစေမှာပါ။ အဲဒါကတော့ ပိတ်ရက်တွေမှာ အချိန်အကြာကြီး နှစ်နှစ်ခြိုက်ခြိုက် အိပ်စက်ခြင်းဟာ သင့်ကို အသက်ပိုရှည်စေတယ်ဆိုတာ ပါပဲ။ အဲဒါကြောင့် ပိတ်ရက်မှာ အကြာကြီးအိပ်စက်ခြင်းကနေ ရရှိမယ့် အကျိုးကျေးဇူးတွေကိုလည်း ဝေမျှပေးလိုက်ပါတယ်။


ပိတ်ရက်မှာ အိပ်စက်ခြင်းက ပိုကောင်းပါတယ်


နေ့တိုင်း တစ်နေ့ကို အနည်းဆုံး ၈ နာရီအိပ်စက်ခြင်းဟာ အကောင်းဆုံးဖြစ်တယ်ဆိုတာ သိရှိပြီးဖြစ်မှာပါ။ ဒါပေမဲ့ အိပ်စက်ခြင်းနဲ့ပတ်သက်လို့ လေ့လာစမ်းစစ်ခဲ့ရာမှာ ဖွင့်ရက်တွေမှာတော့ အချိန်နည်းနည်းအိပ်စက်ပြီး ပိတ်ရက်တွေမှာ အချိန်အကြာကြီးအိပ်စက်ခြင်းဟာ ပိုမိုကောင်းမွန်တယ်လို့ ဆိုပါတယ်။ အကြောင်းကတော့ တစ်နေ့ကို ၈ နာရီထက်မနည်းအိပ်တာထက်စာရင် သင့်ကို အသက်ပိုရှည်စေလို့ပါပဲ။


အိပ်စက်ချိန်နဲ့ သေဆုံးနိုင်ချေကြားက ဆက်စပ်မှုကို လေ့လာခဲ့ကြပါတယ်


နှစ်ပေါင်း ၁၃ နှစ်မှာ လူပေါင်း ၃၈,၀၁၅ ယောက်ကို အုပ်စု ၂ ခုခွဲခြားပြီး သုတေသနပြုလေ့လာခဲ့ကြပါတယ်။ အဲဒါကတော့ အသက် ၆၅ နှစ်အောက်နဲ့ အသက် ၆၅ နှစ် အထက်တို့ ပါပဲ။ တစ်နေ့အိပ်စက်တဲ့ အချိန်ကိုတော့ ၆ နာရီ-၇နာရီ ဝန်းကျင် သတ်မှတ်ထားပါတယ်။ ကျား/မ၊ ခန္ဓာကိုယ်၊ ဆေးလိပ်သောက်သုံးမှု၊ ကိုယ်ကာယ လှုပ်ရှားမှုနဲ့ အလုပ်ချိန်တို့ကိုလည်း ထည့်သွင်းစဉ်းစားခဲ့ကြပါတယ်။


အဲဒီမှာတွေ့ရှိရတာကတော့ ပိတ်ရက်ရော ဖွင့်ရက်မှာပါ အိပ်ချိန် ၅ နာရီထက်နည်းတဲ့ အသက် ၆၅ နှစ်အောက် တွေဟာ တစ်ညကို ၆-၇ နာရီလောက် အိပ်လေ့ရှိသူတွေထက်စာရင် သေဆုံးနိုင်ချေ ၆၅ ရာခိုင်နှုန်း ပိုမိုမြင့်မား ပါတယ်။


ပိတ်ရက်တွေမှာ အချိန်ကြာကြာပိုအိပ်တာဟာ သင့်သက်တမ်းကိုပိုရှည်စေပါတယ်


သင့်အနေနဲ့ အသက် ၆၅ နှစ်အောက်ဖြစ်ပြီး ပိတ်ရက်တွေမှာ အချိန်အကြာကြီးအိပ်လေ့ရှိသူဆိုရင်တော့ အဲဒီလို သေဆုံးနှုန်းမြင့်မားစရာ အကြောင်းမရှိပါဘူး။ သင့်အနေနဲ့ တစ်နေ့ကို ၆-၇ နာရီဝန်းကျင် အိပ်စက်ဖို့ လိုအပ်ပါ တယ်။ စနေ၊ တနင်္ဂနွေဆိုရင်တော့ သင့်အနေနနဲ့ အဲဒီထက် ပိုကြာကြာအိပ်စက်ရမှာ ဖြစ်ပါတယ်။


တစ်နေ့ကို အနည်းဆုံး ၈ နာရီ အိပ်ရမှာဆိုတာက မမှန်ပါဘူး


အဲဒီတော့ များများပိုအိပ်လေ ပိုကောင်းလေလား? မဟုတ်ပါဘူးနော်။ လေ့လာတွေ့ရှိချက်အရဆိုရင် နေ့တိုင်း တစ်နေ့ကို ၈ နာရီထက် ပိုအိပ်တာဟာ တစ်နေ့ ၆-၇ နာရီ အိပ်တာထက်စာရင် သေဆုံးမှုကို ၂၅ ရာခိုင်နှုန်း ပိုမိုတိုးလာစေပါတယ်။ အဲဒါကြောင့် တစ်နေ့ကို အနည်းဆုံး ၈ နာရီ အိပ်ရမယ်ဆိုတာ မမှန်ကန်ပါဘူး။


အဲဒီရှာဖွေတွေ့ရှိချက်တွေဟာ အသက် ၆၅ နှစ်အထက်တွေအတွက်တော့ အကျုံးမဝင်ပါဘူး။ အိပ်စက်တဲ့ ကြာချိန်နဲ့ သေဆုံးနှုန်းဟာ သူတို့အသက်အရွယ်အတွက်တော့ ဆက်စပ်မှုသိပ်မရှိပါဘူး။ အကြောင်းကတော့ အသက်အရွယ်ကြီးရင့်သူ တစ်ယောက်ချင်းစီဟာ သူတို့လိုအပ်တဲ့ အိပ်စက်မှုကို ရရှိပြီးဖြစ်တယ်လို့ ဆိုပါတယ်။


by Cherry Mon
Ref; Bright Side

we.com.mm တွင် ဖော်ပြပါရှိသော ဆောင်းပါးများကို မည်သည့် Website နှင့် Social Media များပေါ်တွင် ပြန်လည်ကူးယူဖော်ပြခြင်းကို ခွင့်မပြုကြောင်း အသိပေးအပ်ပါသည်။ အသေးစိတ်အချက်အလက်များကို ဒီနေရာတွင် ဖတ်ရှုနိုင်ပါသည်။