လာကိုက်တဲ့မြွေကို အပိုင်းပိုင်းဖြစ်အောင် ပြန်ကိုက်ပစ်လိုက်တဲ့ အမူးသမား

ကိုယ့်ကိုလာအော်တဲ့သူကို ပြန်အော်တယ်။ ကိုယ့်အပေါ်အကျင့်ယုတ်တဲ့သူကို ပြန်ယုတ်တယ်။ ကိုယ့်စီးပွားပျက်အောင် လုပ်တဲ့သူကို ပြန်တိုက်ခိုက်တယ်။ စတာတွေကတော့ ဖြစ်တတ်တဲ့ ကိစ္စတွေပါ။ ဒါပေမဲ့ ဒီတစ်ခါ ကိုယ့်ကို ကိုက်တဲ့မြွေကို ပြန်ကိုက်တယ်တဲ့။ ဒါကတော့ နည်းနည်း ထူးဆန်းပြီး အသည်းယားစရာကောင်းသွားပြီ။ အခြားသတ္တဝါမဟုတ်ဘူး။ မြွေတဲ့လေ။

အိန္ဒိယ မြောက်ပိုင်း Uttar Praddesh မှာ အဲဒီအသည်းယားစရာ ဖြစ်ပျက်ခဲ့တာပါ။ Raj Kumar ဆိုသူဟာ သူ့ဘာသူ အိမ်မှာ အရက်အေးဆေး ထိုင်သောက်နေတုန်း မြွေက အသာလေးဝင်လာပြီး သူ့ကို ကိုက်သွားတာပါ။ မူးကလည်း မူးနေတော့ သူလည်း စိတ်တိုတိုနဲ့ ပြန်ကိုက်လိုက်ပုံပေါ်ပါတယ်။ မြွေက အပိုင်းပိုင်းတောင် ပြတ်ထွက်သွားတယ်။

အဲဒီနောက်မှာတော့ Raj ကို ဆေးရုံတင်လိုက်ရပါတယ်။ အခြေအနေကလည်း စိုးရိမ်ရတယ်လို့ သိရပါတယ်။ သူ့ကို ကိုက်သွားတဲ့ မြွေက အနီရောင်ဖြစ်ပြီး အဆိပ်ပြင်းတဲ့မြွေအမျိုးအစားတော့ မဟုတ်ဘူးလို့ ပညာရှင်တွေက ဆိုပါတယ်။ Raj ရဲ့ အဖေဖြစ်သူကတော့ သားဖြစ်သူရဲ့ ဆေးရုံစရိတ် မတတ်နိုင်ကြောင်း ပြောထားပါတယ်။

Image result for NEWS Snake Bites Drunk Man, So Man Bites Snake Back In Revenge

“ဒါက တကယ်ကို အူကြောင်ကြောင်နိုင်တဲ့ ကိစ္စပါ။ ကျွန်တော့်ဆီ ရောက်လာတဲ့ လူနာအများစုက မြွေအကိုက်ခံရလို့ ရောက်လာကြတာပါ။ မြွေကို ကိုက်ပစ်လိုက်လို့ ရောက်လာတာမဟုတ်ပါဘူး။ သူ့အခြေအနေက ဆိုးပါတယ်။ ပိုကောင်းတဲ့ဆေးရုံကို ပြောင်းဖို့လိုပါတယ်။” လို့ Raj ကို ကုသပေးတဲ့ ဆရာဝန်က ဆိုပါတယ်။ အပိုင်းပိုင်းပြတ်သွားတဲ့ မြွေကိုတော့ Raj ရဲ့မိသားစုက မီးရှို့ဖျက်ဆီးပစ်လိုက်ပါပြီ။ 

Image result for NEWS Snake Bites Drunk Man, So Man Bites Snake Back In Revenge

ကလဲ့စားချေတယ်ဆိုတာလည်း ချေတိုင်းကောင်းတာမဟုတ်ဘူးဆိုတာ ဒီအဖြစ်အပျက်က သက်သေပါပဲ။ နောက်တစ်ခုက အခုလို မိုးရာသီမှာ မြွေပါးကင်းပါးကို အထူးဂရုပြုဖို့လိုပါတယ်။ ဖြစ်လာပြီဆိုရင်လည်း ခြေမကိုင်မိ လက်မကိုင်မိ မဖြစ်ရအောင် အရေးပေါ်ကုသနည်းတွေကို လေ့လာထားသင့်ပါတယ်။

Ref; www.worldofbuzz.com

By Paulina

we.com.mm တွင် ဖော်ပြပါရှိသော ဆောင်းပါးများကို မည်သည့် Website နှင့် Social Media များပေါ်တွင် ပြန်လည်ကူးယူဖော်ပြခြင်းကို ခွင့်မပြုကြောင်း အသိပေးအပ်ပါသည်။ အသေးစိတ်အချက်အလက်များကို ဒီနေရာတွင် ဖတ်ရှုနိုင်ပါသည်။