ရေနွေးသောက်သုံးခြင်းက တကယ်ဝိတ်ကျစေနိုင်လား?

ဝိတ်လည်းကျချင်တယ်၊ gym ဆော့ရမှာလည်း ပျင်းတယ် ဒါမှမဟုတ် gym ဆော့ဖို့ သီးသန့်အချိန်မရှိဘူးဆိုရင် တော့ ဝိတ်ချဖို့အတွက် အရိုးရှင်းဆုံး အလွယ်ကူဆုံးနည်းလမ်းတစ်ခုရှိပါတယ်။ အဲဒါကတော့ ရေနွေး သောက်သုံးခြင်း ပါပဲ။ ရေနွေးဆိုတာ အိမ်တိုင်းလိုလိုမှာ အလွယ်တကူရရှိနိုင်တဲ့အရာပါ။ ရေနွေးဟာ ကျန်းမာရေးကို အကျိုးပြုရုံတင်မက ဝိတ်လည်းကျစေပါတယ်။ အဲဒါကြောင့် ရေနွေးက ခန္ဓာကိုယ်ကျန်းမာရေးနဲ့ ဝိတ်ကျစေဖို့အတွက် ဘယ်လိုအထောက်အကူပြုလဲဆိုတာကို ဖော်ပြပေးလိုက်ပါတယ်။


၁။ လူ့ခန္ဓာကိုယ်မှာ ရေဓာတ်ပြည့်ဝနေစေမယ့် သဘာဝအကျဆုံးနည်းလမ်းတစ်ခုကတော့ ရေလုံလောက်စွာ သောက်သုံးခြင်းပါပဲ။ အပူပဲဖြစ်ဖြစ် အအေးပဲဖြစ်ဖြစ်ပါ။ အာဟာရတွေစုပ်ယူဖို့နဲ့ စွန့်ပစ်အရာတွေကို စွန့်ထုတ်ဖို့ အတွက် ခန္ဓာကိုယ်မှာရှိတဲ့ ဆဲလ်တိုင်းက ရေကို လိုအပ်ပါတယ်။ အဲဒါကြောင့် လူတစ်ယောက်ဟာ တစ်နေ့ကို အနည်းဆုံး ရေ ၈ ဖန်ခွက်လောက် သောက်သုံးသင့်ပါတယ်။ ရေအေးပဲဖြစ်ဖြစ်၊ ရေနွေးပဲဖြစ်ဖြစ် ကောင်းပေမဲ့ ရေနွေးကတော့ သင့်ခန္ဓာကိုယ်ကျန်းမာရေးအတွက် ပိုမိုကောင်းမွန်ပါတယ်။


၂။ ရေနွေးသောက်သုံးခြင်းဟာ ခန္ဓာကိုယ်တွင်းကို ထိရောက်စွာ သန့်စင်စေဖို့ အထောက်အကူပြုပါတယ်။ တစ်နေ့ကို ရေနွေး ၂ ခွက်လောက်သောက်ရုံနဲ့ အစာမကြေနဲ့ ပြဿနာကို ဖြေရှင်းနိုင်ပါတယ်။ မနက်စောစော မှာ ရေနွေးတစ်ခွက်သောက်သုံးခြင်းဟာ ခန္ဓာကိုယ်တွင်းက အဆိပ်အတောက်တွေကို သန့်စင်ဖယ်ရှားပေးနိုင်ပါ တယ်။ ဒါ့ပြင် မနက်တိုင်းရေနွေးပုံမှန်သောက်ခြင်းဟာ ဝမ်းပုံမှန်သွားစေပြီး ဝမ်းချုပ်တဲ့ဝေဒနာကို သက်သာစေပါတယ်။


၃။ ရေနွေးဟာ ခန္ဓာကိုယ်တွင်းက အဆီပိုတွေကို ဖယ်ရှားပေးနိုင်တာကြောင့် ဝိတ်ကျဖို့အတွက် အထောက်အကူဖြစ်စေပါတယ်။ ရေဓာတ်ပြည့်ဝနေတဲ့ ခန္ဓာကိုယ်ဟာ ကြွက်သားနဲ့ ခန္ဓာကိုယ်အစိတ်အပိုင်းတွေ ရဲ့ လှုပ်ရှားမှုကို သွက်လက်မြန်ဆန်စေပါတယ်။ အဲဒါကြောင့် ခန္ဓာကိုယ်တွင်းက ဇီဝကမ္မဖြစ်စဉ်ကို ပိုကောင်း စေပြီး ကယ်လိုရီတွေကိုလည်း အလျင်အမြန်လောင်ကျွမ်းစေနိုင်ပါတယ်။


၄။ ပုံမှန်အနေနဲ့ အစားမစားခင် ၁၅ မိနစ်အလိုမှာ ရေနွေးကို သောက်သုံးပေးသင့်ပါတယ်။ အဲဒီလိုသောက်သုံး ပေးခြင်းက အစားအလွန်အကျွံစားမိတာမျိုး မဖြစ်စေတော့ဘဲ ကယ်လိုရီကိုလည်း လျှော့ချပေးနိုင်ပါတယ်။ ရေအေးထက်စာရင် မနက်တိုင်း ရေနွေးသောက်သုံးပေးခြင်းက အစာစားချင်စိတ် အလွန်အကျွံဖြစ်ပေါ်ခြင်းကို လျော့ကျစေသလို ရေဓာတ်ဖြည့်တင်းပေးပြီး အစာအိမ်အတွက်လည်း ပိုကောင်းပါတယ်။


၅။ အိပ်ရာနိုးနိုးချင်း အစာအိမ်ထဲမှာ ဘာမှမရှိသေးတဲ့အချိန်မှာ ရေနွေးကို သောက်သုံးရမှာဖြစ်ပါတယ်။ ရေနွေးနွေးထဲမှာ သံပုရာရည်နည်းနည်းနဲ့ ပျားရည်တို့ကို ရောထည့်ပြီး သောက်သုံးမယ်ဆိုရင်လည်း အစာချေ စနစ်ကို ပိုကောင်းစေပြီး ကျန်းမာလှပတဲ့အသားအရေကို ရရှိစေမှာပါ။
၆။ ဝိတ်ကျဖို့အတွက် ရေနွေးသောက်သုံးရာမှာ ရေနွေးဖြူကိုပဲ အဓိကထားသောက်သုံးသင့်ပါတယ်။ အပူဆိုပေမဲ့ ရေနွေပူတစ်ခွက်ကို ကော်ဖီ ဒါမှမဟုတ် လက်ဖက်ရည်တို့နဲ့ အစားထိုးသောက်သုံးလို့မရပါဘူး။


၇။ ရေနွေးအဖြူချည်းပဲ အမြဲမသောက်ချင်ဘူးဆိုရင်တော့ ရေနွေးပူထဲမှာ ပျားရည် ဒါမှမဟုတ် သဘာ၀ သံပုရာ ရည်နည်နည်းကို ထပ်ပေါင်းထည့်ပြီး သောက်သုံးနိုင်ပါတယ်။ ဒါ့ပြင် စပါးလင်၊ ဂျင်းနဲ့ ပူစီနံတို့လို ဆေးဘက်ဝင် အမွှေးအကြိုင်ပင်တွေတင်မက သစ်သီးစိတ်လေးတွေကို ထည့်ပြီးလည်း သောက်နိုင်ပါတယ်။


ကဲ… ဝိတ်ကျချင်တယ်၊ လေ့ကျင့်ခန်းလည်းသိပ်မလုပ်ချင်ဘူးဆိုရင်တော့ ရေနွေးကိုသာ ပုံမှန်သောက်သုံး လိုက်ပါ။ ရေနွေးသောက်သုံးခြင်းက ဝိတ်ကျစေဖို့ အလွယ်အကူဆုံးနဲ့ ကုန်ကျစရိတ်အသက်သာဆုံး နည်းလမ်း တစ်ခုပါပဲ။ ဒါ့ပြင် ရေနွေးဟာ ဝိတ်ကျဖို့တင်မက ကျန်းမာရေးအတွက်လည်း အကျိုးများစွာရရှိစေပါတယ်။


by Cherry Mon
Photo Credit: Unsplash, Pinterest
Ref; StyleCraze

we.com.mm တွင် ဖော်ပြပါရှိသော ဆောင်းပါးများကို မည်သည့် Website နှင့် Social Media များပေါ်တွင် ပြန်လည်ကူးယူဖော်ပြခြင်းကို ခွင့်မပြုကြောင်း အသိပေးအပ်ပါသည်။ အသေးစိတ်အချက်အလက်များကို ဒီနေရာတွင် ဖတ်ရှုနိုင်ပါသည်။