ပညာရေးဝန်ကြီးဌာန၊ အခြေခံပညာရေးဦးစီးဌာန နှင့် Vito ပဲနို့ တို့ ပူးပေါင်းကာ နားလည်မှုစာချွန်လွှာချုပ်ဆို

ပညာရေးဝန်ကြီးဌာန၊ အခြေခံပညာရေးဦးစီးဌာနမှ တာဝန်ရှိသူနှင့် Europe & Asia Beverage Co., Ltd. မှ တာဝန်ရှိသူတို့သည် “Vito - Kids are Our Future” ဟူသည့် ကျောင်းသူ၊ ကျောင်းသားများအား အာဟာရပြည့်ဝသော ပဲနို့တိုက်ကျွေးခြင်းနှင့် အာဟာရဆိုင်ရာဗဟုသုတများ ဖြန့်ဝေခြင်း အစီအစဉ်ကို ပူးပေါင်း လက်တွဲလုပ်ဆောင်ရန် နားလည်မှုစာချွန်လွှာအား ယနေ့တွင် ပညာရေး ဝန်ကြီးဌာနရုံး၌ ချုပ်ဆိုခဲ့ကြသည်။

အဆိုပါ နားလည်မှုစာချွန်လွှာကို ပညာရေးဝန်ကြီးဌာန၊ အခြေခံပညာရေးဦးစီးဌာနမှ ညွှန်ကြားရေးမှူးချုပ် ဦးကိုလေးဝင်းနှင့်  Europe & Asia Beverages Co., Ltd. ၏ အမှုဆောင်ဒါရိုက်တာဖြစ်သူ ဦးကျော်ဝင်းထွန်းတို့မှ ရေးထိုးခဲ့ပြီး အခမ်းအနားသို့  ပညာရေးဝန်ကြီးဌာနမှ သက်ဆိုင်ရာတာဝန်ရှိသူများ၊  Europe & Asia Beverages Co., Ltd. မှ တာဝန်ရှိသူများနှင့် စာနယ်ဇင်းမီဒီယာအသီးသီးမှ တာဝန်ရှိသူများ တက်ရောက်ခဲ့ကြပါသည်။


ညွှန်ကြားရေးမှူးချုပ် ဦးကိုလေးဝင်းက “ကျန်းမာရေးနဲ့ ပညာရေးဟာ လူသားအရင်းအမြစ်တိုးတက်ဖွံ့ဖြိုးဖို့ သာမက တိုင်းပြည်တိုးတက်ဖွံ့ဖြိုးဖို့အတွက်ပါ အဓိကကျတဲ့ အရာတွေဖြစ်ပါတယ်။ ကျွန်တော်တို့ရဲ့ အနာဂတ်ဖြစ်တဲ့ ကလေးတွေဟာ ကျန်းမာပြီး ပညာရည်မြင့်မားဖို့လိုအပ်ပါတယ်။  ကျန်းမာဖို့ဆိုရင် အသားဓါတ်၊ သံဓါတ်၊ ကယ်လစီယမ်၊ အိုင်အိုဒင်း၊ ဗိုက်တာမင်ဒီ အစရှိတဲ့ဓါတ်တွေ မျှမျှတတပါဝင်တဲ့ စားသောက်မှုပုံစံရှိဖို့ လိုအပ်ပါတယ်။ ပညာရှင်တွေရဲ့ လေ့လာပြောကြားချက်အရ ကလေးတွေရဲ့ တစ်နေ့တာ စားသောက်တဲ့ အစားအစာထဲမှာ ဖော်ပြထားတဲ့ ဓါတ်တွေ အများစုပါဝင်တဲ့ နို့ကိုပါထည့်ပြီး သောက်သုံးဖို့ တိုက်တွန်းထားပါတယ်။  ဒါကြောင့်မို့ Vito ပဲနို့နဲ့ လက်တွဲလုပ်မယ့် ဒီအစီအစဉ်က လူသားအရင်းအမြစ်ဖွံ့ဖြိုးဖို့နဲ့ နိုင်ငံတိုးတက်ဖို့အထောက်အကူဖြစ်မဲ့ အစီအစဉ်ဖြစ်တယ်လို့ ယုံကြည်ပါတယ်။  အခြေခံပညာရေး ဦးစီးဌာန အနေနဲ့လည်း Vito ပဲနို့ နဲ့ အခုလို လက်တွဲပြီး ကျောင်းသားတွေအတွက် အကျိုးရှိမယ့်အစီအစဉ်ကို ပြုလုပ်ရမှာကို ဝမ်းသာကြိုဆိုပါတယ်။ ဒီလိုအစီအစဉ်မျိုးကို စိတ်ကူးအကောင်အထည်ဖော်ဖို့ လုပ်ဆောင်နေ သူတွေကိုလည်း ကျေးဇူးတင်ကြောင်း ပြောလိုပါတယ်။” ဟု ပြောကြားခဲ့ပါသည်။


Europe & Asia Beverages Co., Ltd. ၏ အမှုဆောင်ဒါရိုက်တာဖြစ်သူ ဦးကျော်ဝင်းထွန်းက “ဒီစီမံချက်ရဲ့ အဓိကရည်ရွယ်ချက်ကတော့ ကျောင်းနေကလေးတွေကို အာဟာရနဲ့ပတ်သက်တဲ့ ဗဟုသုတတွေ ပိုမိုသိရှိနားလည်ဖို့ပဲဖြစ်ပါတယ်။ ကျွန်တော်တို့ ဒီအစီအစဉ်ကိုလုပ်ဖို့ စိတ်ကူးကို ၂၀၁၇ခုနှစ်ဇန်နဝါရီလမှာ ကျင်းပခဲ့တဲ့ အာဟာရဓါတ်နဲ့ ပတ်သက်တဲ့ အမျိုးသားအဆင့် ညှိနှိုင်းအစည်းအဝေးမှာ နိုင်ငံတော်အတိုင်ပင်ခံ ဒေါ်အောင်ဆန်းစုကြည် ပြောခဲ့တဲ့မိန့်ခွန်းကနေ ရခဲ့တာဖြစ်ပါတယ်။ နိုင်ငံတော်အတိုင်ပင်ခံက ကလေးတွေရဲ့ဖွံ့ဖြိုးကြီးထွားမှုအတွက် အစိုးရအဖွဲ့အစည်းတွေ၊ ပရဟိတအဖွဲ့အစည်းတွေနဲ့ လူကြီးမိဘတွေမှာ တာဝန်ရှိကြောင်း ပြောကြားသွားခဲ့ပါတယ်။ ၂၀၁၄ ခုနှစ် သန်းခေါင်စာရင်းနဲ့ UNICEF ကထုတ်ပြန်တဲ့စစ်တမ်းမှာ မြန်မာနိုင်ငံမှာရှိတဲ့ ကလေးသုံးပုံတစ်ပုံက အာဟာရချို့တဲ့တယ်လို့ ဖော်ပြထားပါတယ်။ ကျွန်တော်တို့ကုမ္ပဏီဟာ မြန်မာနိုင်ငံမှာရှိတဲ့ တာဝန်သိစီးပွားရေးလုပ်ငန်းတစ်ခု အနေနဲ့ နိုင်ငံရဲ့ အနာဂတ်ဖြစ်တဲ့ကလေးများအပေါ် ရင်းနှီးမြှပ်နှံ ရာမှာ တစ်ဖက်တစ်လမ်းကနေ ပါဝင်ကူညီပြီးတော့ လိုအပ်နေတဲ့ ဒီကွက်လပ်ကို အတိုင်းအတာတစ်ခုအထိ ဖြည့်ဆည်း ပေးနိုင်မယ်လို့မျှော်လင့်ပါတယ်။  Vito ပဲနို့အနေနဲ့ အခုလို ပညာရေးဝန်ကြီးဌာနနဲ့ လူသားအရင်းအမြစ် ဖွံ့ဖြိုးဖို့ ကျန်းမာရေး၊ ပညာရေးတိုးတက်ဖို့ လက်တွဲအလုပ်လုပ်ခွင့်ရတဲ့အတွက် ဂုဏ်ယူမိသလို ဒီအစီအစဉ်ကနေ ကောင်းမွန်တဲ့ရလဒ်တွေရလာမယ်လို့ ယုံကြည်ပါတယ်။” ဟု ပြောကြားသွားခဲ့ပါသည်။

Vito ပဲနို့အား မြစ်ငယ်မြို့ရှိ မြန်မာနိုင်ငံ၏ တစ်ခုတည်းသော UHT စက်ရုံဖြစ်သည့်  E.A.B.C ၏ ကိုယ်ပိုင်စက်ရုံမှ ထုတ်လုပ်ထားခြင်းဖြစ်ပါသည်။ ထုတ်လုပ်ဖြန့်ဖြူးသည့်ပဲနို့၏ အာဟာရတန်ဖိုး၊ အရသာနှင့် အရည်အသွေးကို ကြာရှည်ခံသည့် ဓါတုပစ္စည်းမျာအသုံးမပြုပဲထိန်းသိမ်းရန် ရည်ရွယ်ကာ ဤစက်ရုံတွင် Tetra Pak ၏ နောက်ဆုံးပေါ် နိုင်ငံတကာ အဆင့်မှီ စက်ပစ္စည်းများကိုအသုံးပြုထားပါသည်။ Vito ပဲနို့သည် မျိုးရိုးဗီဇပြုပြင်ထားခြင်းမရှိသော (GMO free) စားသောက်ကုန်ဖြစ်ပြီး  မြန်မာနိုင်ငံ အစားအသောက်နှင့် ဆေးဝါးကွပ်ကဲရေး ဦးစီးဌာနမှ FDA အသိအမှတ်ပြု လက်မှတ်လည်း ရရှိထားပါသည်။ ထို့အပြင် Vito ပဲနို့တွင် ပရိုတိန်းဓါတ်၊ ကယ်လစီယမ်ဓါတ်နှင့် ဗီတာမင်ဘီဝမ်းတို့ ကြွယ်ဝစွာပါဝင်ပါသည်။


ဤစီမံချက်၏ရည်ရွယ်ချက်မှာ ကျောင်းပေါင်း ၄၃၈ ကျောင်းမှ ကျောင်းသားဦးရေ ၃၀၀,၀၀၀ ကျော်၏ အာဟာရ အခြေအနေကိုမြှင့်တင်ခြင်းဖြင့် ကလေးများကျန်းမာစွာကြီးပြင်းလာအောင် တစ်ဖက်တစ်လမ်းမှ အထောက်အကူပြုရန် ဖြစ်သည်။  ဤရည်ရွယ်ချက်ကိုပြည့်မီရန် Vito ပဲနို့နှင့် အခြေခံပညာရေးဦးစီးဌာနတို့ ပူးပေါင်း၍ ကျောင်းတွင်းအာဟာရ မြှင့်တင်ခြင်းအစီအစဉ်ကို တစ်နှစ်လျှင်နှစ်ကြိမ်နှုန်းဖြင့် ငါးနှစ်ဆက်တိုက် ပြုလုပ်သွားမည်ဖြစ်ပါသည်။  ဤစီမံချက်ကို ပိုမိုတိုးချဲ့ပြုလုပ်သွားရန်ရည်ရွယ်ထားပြီး ပဉ္စမမြောက်နှစ်တွင် ကျောင်းပေါင်း ၁,၀၀၀မှ ကျောင်းသူ၊ ကျောင်းသားများ ကိုပညာသင်ဆုများပေးအပ်ခြင်း၊ အာဟာရပြည့်ဝသော နို့နှင့်ပဲနို့များ တိုက်ကျွေးခြင်းနှင့် အာဟာရဆိုင်ရာဗဟုသုတများ ဖြန့်ဝေခြင်း အစီအစဉ်ကို လုပ်ဆောင်သွားရန် ရည်မှန်းထားကြောင်းလည်းသိရသည်။

we.com.mm တွင် ဖော်ပြပါရှိသော ဆောင်းပါးများကို မည်သည့် Website နှင့် Social Media များပေါ်တွင် ပြန်လည်ကူးယူဖော်ပြခြင်းကို ခွင့်မပြုကြောင်း အသိပေးအပ်ပါသည်။ အသေးစိတ်အချက်အလက်များကို ဒီနေရာတွင် ဖတ်ရှုနိုင်ပါသည်။