၂ လအတွင်း ဗိုက်အဆီကျစေမယ့် ရိုးရှင်းတဲ့ နည်းလမ်း (၇) သွယ်

လူတစ်ယောက်ဝလာပြီ အဆီတက်လာပြီဆိုရင် အရင်ဆုံးသိသာလာတာကတော့ ဝမ်းဗိုက်နေရာပါပဲ။ မဝဘူးဆိုရင်တောင် ဗိုက်အဆီရှိကြတာများပါတယ်။ အဆီချဖို့ဆိုတာကလည်း အချိန်အတိုင်းအတာတစ်ခုတော့ ယူရပါတယ်။ အချိန် ၂ လအတွင်း ဗိုက်အဆီကျပြီး ချပ်ရပ်လှပဖို့အတွက် လိုက်နာရမယ့် နည်းလမ်း (၇) သွယ်ကို ဖော်ပြပေးလိုက်ပါတယ်။


(၁) ကယ်လိုရီမျှတအောင်စားသုံးပါ။


ကယ်လိုရီဓာတ် လိုအပ်တာထက်ပိုများခြင်းဟာ ဝိတ်တက်စေတယ်ဆိုတာ လူသိများတဲ့ အကြောင်းအရာ တစ်ခုပါ။ ဒါပေမဲ့ ကယ်လိုရီချို့တဲ့ပြန်ရင်လည်း မကောင်းပါဘူး။ အမျိုးသမီးတစ်ယောက်အနေနဲ့ တစ်နေ့ကို ၁၂၀၀ ကယ်လိုရီ ထက်နည်းအောင် မစားသင့်ပါဘူး။ ကယ်လိုရီစားသုံးမှုနည်းလွန်းရင်လည်း အစားချေခြင်းကို နှေးကွေးစေပြီး သင့်ရဲ့ဗိုက်ကို အဆီပိုတက်စေပါတယ်။ အဲဒါကြောင့် အစိမ်းရောင်ရှိတဲ့အရွက်၊ အသီးအနှံနဲ့ သစ်သီးတွေလို အာဟာရပြည့်ဝတဲ့ အစားအစာတွေ များများစားပေးပါ။


(၂) သကြားလျှော့စားပါ။


သကြားဟာ တိတိပပအာဟာဓာတ်ရတာမျိုးမရှိဘဲ ကယ်လိုရီများတဲ့ စားစရာတစ်ခုပါ။ လေ့လာတွေ့ရှိချက်အရ ဆိုရင် သကြားဓာတ်များပြီးချိုတဲ့ အဖျော်ယမကာတွေ စားသုံးခြင်းဟာ ဗိုက်အဆီပိုတက်စေပါတယ်။ အဲဒါကြောင့် အချိုရည်တွေနဲ့ သကြားလုံး၊ ကွတ်ကီး၊ ဒိုးနပ်တို့လို အချိုစာတွေ အလွန်အကျွံစားသုံးခြင်းကိုလည်း ရှောင်သင့်ပါတယ်။


(၃) ပြန်လည်မွမ်းမံထားတဲ့ ဂျုံမုန့်တွေ လျှော့စားပါ။


သဘာဝအတိုင်းမဟုတ်ဘဲ စားကောင်းအောင်ပြုပြင်မွမ်းမံထားတဲ့ ဂျုံနဲ့လုပ်တဲ့ မုန့်တွေဟာလည်း သကြားလိုပဲ သင့်ရဲ့ သွေးတွင်းသကြားဓာတ်ကို တိုးစေပါတယ်။ အဲဒီလိုမုန့်တွေကိုစားရင် သင်ဗိုက်မပြည့်ခင်မှာပဲ သင့်ကို ကယ်လိုရီများစွာ တိုးလာစေမှာပါ။


(၄) အမျှင်ဓာတ်ပါတဲ့ အစားအစာတွေ များများပိုစားပါ။


အမျှင်ဓာတ်ပါတဲ့ စားစရာတွေစားသုံးခြင်းက သင့်ဗိုက်ကို အဆီကျစေပါတယ်။ အများကြီးစားစရာလည်း မလိုပါဘူး။ တစ်နေ့ကို ၆ ဂရမ်လောက် စားသုံးပေးရုံနဲ့ လုံလောက်ပါတယ်။ အမျှင်ဓာတ်ပြည့်ဝတဲ့ စားစရာတွေထဲမှာ သဘာဝဂျုံနဲ့လုပ်ထားတဲ့ ကွေကာ၊ ချက်ပြုတ်ထားတဲ့ ပဲ၊ လတ်ဆတ်တဲ့ သစ်သီး၊ အားလူးဖုတ်၊ ကန်စွန်းဥဖုတ်နဲ့ ရာနှုန်းပြည့်ဂျုံပေါင်မုန့်စစ်စစ်တို့ ပါဝင်ပါတယ်။


(၅) ပုံမှန်လေ့ကျင့်ခန်းလုပ်ပါ။


အတော်များများ ဝိတ်ကျဖို့အတွက် လေ့ကျင့်ခန်းလုပ်ကြပါတယ်။ ကာဒီယိုလိုလေ့ကျင့်ခန်းက ကယ်လိုရီတွေကို လောင်ကျွမ်းစေပြီး ဆန့်ထုတ်မှုကို အသားပေးတဲ့ လေ့ကျင့်ခန်းတွေကတော့ သင့်ရဲ့ဗိုက်အဆီကျဖို့နဲ့ ကာလရှည်ကြာ သင့်ရဲ့ဝိတ်ကို ထိန်းပေးဖို့ အထောက်အကူဖြစ်စေပါတယ်။


(၆) လေ့ကျင့်ခန်းမဟုတ်တဲ့ ကိုယ်လက်လှုပ်ရှားမှုလေးတွေ လုပ်ပေးပါ။


လေ့ကျင့်ခန်းစစ်စစ်မဟုတ်ဘဲ ကိုယ်လက်လှုပ်ရှားမှုဖြစ်စေမယ့် အပြုအမူလေးတွေ နေ့စဉ်ပြုလုပ်ပေးဖို့ လိုအပ်ပါတယ်။ ဥပမာဆိုရရင် လမ်းလျှောက်တာ၊ ပန်းပင်စိုက်တာ၊ ကလေးတွေနဲ့ကစားတာတို့လို လှုပ်ရှားမှုလေးတွေပါ။


(၇) လုံလောက်စွာ အိပ်စက်ပါ။


အစားရှောင်တာနဲ့ လေ့ကျင့်ခန်းလုပ်တာတွေက ဝိတ်လျှော့ဖို့အတွက် အရေးကြီးတာမှန်ပေမဲ့ အိပ်ရေးမဝရင် စိတ်ဖိစီးမှုပိုတိုးစေပြီး သင့်ကိုဝိတ်ပိုတက်စေပါတယ်။ အရွယ်ရောက်ပြီးသားလူတစ်ယောက်အနေနဲ့ တစ်ညကို အနည်းဆုံး ခုနစ်နာရီကနေ ကိုးနာရီအထိ တစ်ဆက်တည်းအိပ်စက်ပေးဖို့ လိုပါတယ်။

by Cherry Mon

Ref; msn.com   

we.com.mm တွင် ဖော်ပြပါရှိသော ဆောင်းပါးများကို မည်သည့် Website နှင့် Social Media များပေါ်တွင် ပြန်လည်ကူးယူဖော်ပြခြင်းကို ခွင့်မပြုကြောင်း အသိပေးအပ်ပါသည်။ အသေးစိတ်အချက်အလက်များကို ဒီနေရာတွင် ဖတ်ရှုနိုင်ပါသည်။