UAB ဘဏ်ခွဲမန်နေဂျာမှ ကျပ်သိန်း (၈၀၀၀)ကျော် အလွဲသုံးစားပြုပြီး ထွက်ပြေးတိမ်းရှောင်နေ

ယမန်နေ့ ဇွန်လ (၂၀)ရက်နေ့က UAB ဘဏ်ခွဲရဲ့ မန်နေဂျာမှ ငွေကျပ် သိန်း(၈၀၀၀)ကျော်အား အလွဲသုံးစားပြုလုပ်ပြီး ထွက်ပြေးတိမ်းရှောင်နေသဖြင့် မြန်မာနိုင်ငံရဲတပ်ဖွဲ့နဲ့ ပူးပေါင်းပြီး ရှာဖွေဖမ်းဆီးနေတယ်လို့ UAB Bank မှ ထုတ်ပြန်ထားပါတယ်။ မန္တလေးမြို့၊ ချမ်းအေးသာဇံမြို့နယ်ရှိ UAB ဘဏ်ခွဲတစ်ခုဖြစ်တဲ့ ဒိုင်းမွန်းပလာဇာဘဏ်ခွဲရဲ့ တာဝန်ခံဖြစ်သူ အကြီးတန်းမန်နေဂျာ ဦး………………….. ဟာ ဘဏ်မှ Customer တစ်ဦးရဲ့ ငွေစာရင်းရှိ ငွေကျပ် (၈၀၆,၂၉၄,၂၅၆)အား မသမာသော နည်းလမ်းတွေနဲ့ မမှန်မကန် စာရင်းရေးသွင်းတာတွေ ပြုလုပ်ခဲ့ပြီးနောက် ငွေစာရင်းပိုင်ရှင်ရဲ့ တိုင်ကြားချက်အရ ဇွန်လ (၁၀)ရက်နေ့က စစ်ဆေး ပေါ်ပေါက်ခဲ့တယ်လို့ သိရပါတယ်။

အဆိုပါ ငွေစာရင်းပိုင်ရှင်ရဲ့ ဘဏ်စာအုပ် အမှတ်(၁)ထဲမှာ ငွေကျပ် (၆၆၅,၅၀၀,၀၀၀)၊ ဘဏ်စာအုပ် အမှတ်(၂)ထဲမှာ ငွေကျပ် (၁၄၀,၇၉၄,၂၅၅.၆၂) လို့ ရိုက်နှိပ်ဖော်ပြထားပေမယ့် အမှန်တကယ်ရှိနေတဲ့ ငွေစာရင်းမှာ ဘဏ်စာအုပ် အမှတ်(၁)မှာ ငွေလက်ကျန် ကျပ် (၁၀၀,၀၀၀)နဲ့ ဘဏ်စာအုပ် အမှတ် (၂)မှာ ငွေသားလက်ကျန်မရှိကြောင်း စစ်ဆေးတွေ့ရှိခဲ့ပါတယ်။

၎င်း UAB Bank ရဲ့ ဘဏ်ခွဲအကြီးတန်းမန်နေဂျာဟာ လွန်ခဲ့တဲ့ ဇွန်လ (၇)ရက်နေ့တည်းက ရည်ရွယ်ချက်ရှိရှိ နှုတ်ထွက်စာတင်ထားပြီး ထွက်ပြေးတိမ်းရှောင်ရန် ကြိုတင်စီစဉ်ထားကြောင်းနဲက ဘဏ်ရဲ့ တာဝန်ရှိသူတွေမှ နည်းအမျိုးမျိုးနဲ့ ဆက်သွယ်နိုင်ဖို့ ကြိုးစားပေမယ့် အကြောင်းပြန်ကြားခြင်းမရှိကြောင်း သိရပါတယ်။

လက်ရှိမှာတော့ တရားခံ ဦး……………………… အား Customer ရဲ့ ယုံကြည်မှုကို အလွဲသုံးစားပြုကာ ကိုယ်ကျိုးအတွက် ဆောင်ရွက်ခဲ့ကြောင်း သိသာထင်ရှားတဲ့အတွက် ဇွန် (၁၈)ရက်နေ့က အမှတ် (၈) ရဲစခန်း (ချမ်းအေးသာဇံမြို့နယ်)မှာ (ပ) ၅၄၉/ ၂၀၁၉၊ တည်ဆဲ ပြစ်မှုဆိုင်ရာ ဥပဒေပုဒ်မ ၄၀၈ ၊ ၄၆၈ တို့နဲ့ အမှုဖွင့်ထားတယ်လို့ ထုတ်ပြန်ချက်မှာ ဖော်ပြထားပါတယ်။

Source; UAB Bank FB

we.com.mm တွင် ဖော်ပြပါရှိသော ဆောင်းပါးများကို မည်သည့် Website နှင့် Social Media များပေါ်တွင် ပြန်လည်ကူးယူဖော်ပြခြင်းကို ခွင့်မပြုကြောင်း အသိပေးအပ်ပါသည်။ အသေးစိတ်အချက်အလက်များကို ဒီနေရာတွင် ဖတ်ရှုနိုင်ပါသည်။